वर्धा : केंद्रीय रस्ते परिवहन व महामार्ग मंत्री नितीन गडकरी यांच्याकडे जलसंधारण, नदीविकास व गंगा संरक्षण मंत्रालयाची जबाबदारी नव्याने आल्याने खासदार रामदास तडस यांनी त्यांची नागपूर निवासस्थानी भेट घेऊन शुभेच्छा दिल्या.
चार सप्टेंबरला झालेल्या भेटीदरम्यान अनौपचारिक चर्चेमध्ये वर्धा लोकसभा मतदार क्षेत्रातील महामार्ग विकास कामे, केंद्रीय मार्ग निधी योजनेतील विकास कामे, सिंदी रेल्वे येथील ड्रायपोर्ट या सोबतच केंद्र शासनाच्या माध्यमातून पुरस्कृत असलेला निम्न वर्धा सिंचन प्रकल्पातील कामे आदी विषयावर विचार विनिमय झाला.
‘महामार्ग क्षेत्रात व शिपिंग मंत्रालयातर्फे गडकरींच्या नेतृत्त्वात ज्या प्रकारे अभूतपूर्व विकास झाला त्याच धर्तीवर सिंचन क्षेत्रात व गंगा नदी स्वच्छतेमध्ये देखील फार मोठा सकारात्मक बदल दिसेल व कामे वेगाने पूर्ण होतील,’ असा विश्वास खासदार तडस यांनी व्यक्त केला.
